ახალციხის მუნიციპალიტეტმა 2017 წლის ბიუჯეტი დაამტკიცა

ახალციხის მუნიციპალიტეტის საკრებულომ, მომავალი წლის ბიუჯეტი დაამტკიცა. არსებულ პროექტს მხარი უმრავლესობის ყველა დეპუტატმა დაუჭირა.

საკრებულოს 16–ე სხდომას, ,,ერთიანი ნაციონალური მოძრაობის” წევრები არ ესწრებოდნენ.

2017 წლის დამტკიცებული ბიუჯეტი, პირვანდელ ვერსიასთან შედარებით, 80 000 ლარით მეტია და 6 400 000 ლარით განისაზღვრა. გამგეობაში განმარტავენ, რომ  აღნიშნული ცვლილება ქონების გადასახადის შემოსულობებმა განაპირობა. კიდევ ერთი ცვლილება, რომელიც მთავარი ფინანსური დოკუმენტის პროექტში აისახა, ადმინისტრაციული ხარჯების შემცირებაა.