ახალციხეში სახანძრო-სამაშველო სამსახურის განახლებული შენობა გაიხსნა
შინაგან საქმეთა მინისტრის მოადგილემ მერაბ მალანიამ, შსს-ს საგანგებო სიტუაციების მართვის სააგენტოს დირექტორთან ზვიად ქაწაშვილთან ერთად, ახალციხეში სამცხე-ჯავახეთის საგანგებო სიტუაციების მართვის სამმართველოს ახალციხის განახლებული შენობა გახსნა.
შსს-ს ინფორმაციით, საგანგებო სიტუაციების მართვის სააგენტომ ძველი სახანძრო-სამაშველო შენობა გაარემონტა და მიმდებარე ტერიტორიაზე არსებული ინფრასტრუქტურის რეაბილიტაცია განახორციელა. ახალციხის სამმართველოს განახლებული შენობა თანამედროვე ინვენტარითა და ტექნიკით აღიჭურვა, შეკეთდა სასწავლო კოშკურა.
შს მინისტრის მოადგილემ სამმართველოს რეაბილიტირებული შენობა, სახანძრო-სამაშველო ტექნიკა, მეხანძრე-მაშველების სრული აღჭურვილობა და ახალი ავტოფარეხები დაათვალიერა.
განახლებულ შენობაში 33 მეხანძრე-მაშველი და ადმინისტრაციის ხუთი თანამშრომელი იმუშავებს.
შს სამინისტრო, მთელი საქართველოს მასშტაბით, სახანძრო-სამაშველო შენობების რეაბილიტაციასა და მშენებლობას ახორციელებს. 2016 წელს განახლდა და უახლესი ტექნიკით აღიჭურვა შსს-ს საგანგებო სიტუაციების მართვის სააგენტოს 11 შენობა და აშენდა ერთი ახალი ნაგებობა. მიმდინარე წლის ბოლომდე სამი ახალი ნაგებობის მშენებლობის დასრულება და ერთი ძველი შენობის რეაბილიტაცია იგეგმება.
დონორები
9arkhi.wordpress.com 
You must be logged in to post a comment.