ქართული ლარის განახლებული ბანკნოტების სერიამ, საუკეთესო ბანკნოტის ნომინაციაში გაიმარჯვა

საუკეთესო რეგიონალური ბანკნოტის ნომინაციაში “2016 წლის საუკეთესო რეგიონალური ბანკნოტი” ქართული ლარის განახლებული ბანკნოტების სერიამ გაიმარჯვა.

დაჯილდოების ცერემონია, ევროპისა და დსთ–ს ქვეყნების მასშტაბით, მიმდინარე წლის 15 მარტს,  ბუქარესტში, ორგანიზაცია HSP Europe™ საერთაშორისო კონფერენციაზე გაიმართა.

ჯილდო ასევე გადაეცა ყაზახეთის ეროვნული ბანკის მიერ გამოშვებულ ახალ საიუბილეო ბანკნოტს 20 000 ტენგეს.

საქართველოს ეროვნული ბანკის ინფორმაციით, წელს, ნომინაციაზე “2016 წლის საუკეთესო რეგიონალური ბანკნოტი”, წარდგენილი იყო:

ახალი 20 ევრო – ევროპის ცენტრალური ბანკი
შვედური კრონის ახალი სერია – შვედეთის ცენტრალური ბანკი
ახალი 20 000 ფორინტი – უნგრეთის ცენტრალური ბანკი
ახალი 200 შეკელი – ისრაელის ცენტრალური ბანკი
20 000 ტენგე – ყაზახეთის ცენტრალური ბანკი
500 გრივნა – უკრაინის ცენტრალური ბანკი
100 რუბლი საიუბილეო ბანკნოტი – რუსეთის ცენტრალური ბანკი
ბანკნოტების სერია – ბელორუსიის ცენტრალური ბანკი
ლარის განახლებული სერია 20, 50 და 100 ლარი – საქართველოს ეროვნული ბანკი

ნომინაციისთვის წარდგენილი ფულის ნიშნები, მათი დიზაინის, ტექნიკური დახვეწილობის, გამართულობისა და დაცულობის კუთხით არსებული თანამედროვე მიღწევების გათვალისწინებით შეფასდა. .

ორგანიზაცია HSP Europe™ საერთაშორისო კონფერენციას ყოვეწლიურად ატარებს , დაცული ბეჭდვის სფეროში არსებულ უახლეს ტენდენციებთან და ტექნოლოგიებთან დაკავშირებით დისკუსიების, პერსპექტივებისა და გამოცდილების გაზიარების მიზნით, სადაც მონაწილებას  ევროპისა და დსთ-ს ქვეყნების წარმომადგენლები იღებენ.

გასულ წელს HSP Europe™-ის კონფერენციაზე, რომელიც უნგრეთის დედაქალაქ ბუდაპეშტში ჩატარდა, 2015 წლის საუკეთესო რეგიონალურ ბანკნოტად პოლონური ზლოტი დასახელდა.