ნინოწმინდაში რეგიონის აგრო–ტურიზმის განვითარების სტრატეგია განიხილეს

ნინოწმინდის გამგეობაში კონფლიქტებისა და მოლაპარაკებების საერთაშორისო კვლევითი ცენტრის (ICCN) და საერთაშორისო არასამთავრობო ორგანიზაცია “მერსი ქორფსის” წარმომადგენლებმა სამცხე-ჯავახეთის აგრო ტურიზმის განვითარების სტრატეგია წარადგინეს.

სამხარეო ადმინისტრაციის ინფორმაციით, შეხვედრაზე, რომელსაც რეგიონის გუბერნატორი და მუნიციპალიტეტების ხელმძღვანელი პირები დაესწრნენ, სამცხე-ჯავახეთში აგრო ტურიზმის განვითარების მნიშვნელობასა და ამ მიმართულებით რეგიონში არსებულ რესურსებზე იმსჯელეს. აღინიშნა, რომ აგრო ტურიზმის განვითარებისათვის მხარეს  ყველა წინაპირობა გააჩნია. ესენია: მრავალფეროვანი ბუნება, სანადირო და სათევზაო ადგილები, ტბები, მდინარეები, საექსკურსიო მარშრუტები, საინტერესო ისტორიული ძეგლები და ტურისტული ობიექტები, ორიგინალური ტრადიციული სამზარეულო.

აგრო ტურიზმის განვითარების სტრატეგია მიმდინარე პროექტის, „ ჰორიზონტის გაფართოება: გაუმჯობესებული არჩევანი ქალებისა და გოგონების პროფესიული და ეკონომიკური განვითარებისთვის“ ფარგლებში, ამერიკის შეერთებული შტატების განვითარების სააგენტოს (USAID) ფინანსური მხარდაჭერით შემუშავდა. მისი მიზანია, სასოფლო-სამეურნეო საქმიანობა დაუკავშირდეს ტურიზმს, ისე რომ დაცული იყოს სურსათის უსაფრთხოება, გარემოს მდგრადობა; განმტკიცდეს ტრადიციული ცოდნა და პროექტში ჩართულ ბენეფიციარებს შემოსავლის სტაბილური წყარო გაუჩნდეთ.