ნინოწმინდაში საგზაო ინფრასტრუქტურის რეაბილიტაცია მიმდინარეობს

ნინოწმინდის მუნიციპალიტეტში საგზაო ინფრასტრუქტურის რეაბილიტაცია მიმდინარეობს. უკვე დასრულებულია საავტომობილო გზის მშენებლობა სოფელ განძაში. სოფლებში ეშტიასა და სათხეში მიმდინარე სამუშაოებს მხარის გუბერნატორი აკაკი მაჭუტაძე, ადგილობრივი თვითმმართველობისა და სამშენებლო კომპანია შპს „ჯავახ-ავტოგზის“ წარმომადგენლებთან ერთად ადგილზე გაეცნო. პროექტის ფარგლებში დაგეგმილია ტროტუარების მოწყობა და ასფალტ-ბეტონის საფარის ორი ფენის დაგება.

აღნიშნულ სოფლებში არსებულ გზებს რეაბილიტაცია რამდენიმე ათეული წელია არ ჩატარებია. სამუშაოების დასრულების შემდეგ მოსახლეობისათვის განახლებული გზით გადაადგილება და რაიონულ ცენტრთან დაკავშირება გაცილებით მარტივი და კომფორტული იქნება.

ნინოწმიდის მუნიციპალიტეტში საგზაო ინფრასტრუქტურული პროექტები რეგიონებში განსახორციელებელი პროექტების ფონდიდან 1 488 000 ლარით დაფინანსდა. სარეაბილიტაციო სამუშაოები აქ სექტემბრის ბოლოს დასრულდება და ჯამში ასფალტ-ბეტონის საფარი გზის ოთხ კილომეტრამდე მონაკვეთზე დაიგება.