ბორჯომის გამგებლის წინააღმდეგ შეტანილი სარჩელის განხილვა გადაიდო

ახალციხის რაიონულ სასამართლოში ბორჯომის მუნიციპალიტეტის გამგებლის წინააღმდეგ შეტანილი სარჩელის განხილვა  გადაიდო. აღნიშნულის შესახებ შუამდგომლობა პროცესზე დაზარალებულმა მხარემ დააყენა. ნატა კოპაძის თქმით,   მისმა ადვოკატმა პროცესზე გამოცხადება ვერ მოახერხა.

დღესვე ცნობილი გახდა, რომ საქმეში მესამე პირი ჩაერთო – ლონდა ფილიშვილი, რომელმაც ნატა კოპაძე შეცვალა.

მოპასუხე მხარემ – ბორჯომის გამგეობის წარმომადგენელმა „ექოსთან“ კომენტარის გაკეთებაზე უარი განაცხადა.

შეგახსენებთ, რომ ბორჯომის გამგეობის საზოგადოებასთან ურთიერთობის სამსახურის ყოფილმა სპეციალისტმა, სასამართლოში საჩივარი მას შემდეგ  შეიტანა, რაც  ბორჯომის მუნიციპალიტეტში  გამოცხადებულ კონკურსში ტეტსტირება წარმატებით გაიარა, თუმცა  გასაუბრების შემდგომ მის კანდიდატურას უარი ეთქვა.

ნატა კოპაძის თქმით, მოქმედი გამგებელი დიმიტრი ყიფიანი ცდილობს გამგეობაში საკუთარი ნათესავები დაასაქმოს. მისივე განმარტებით, გასაუბრებისას კომისიის ერთ–ერთი წევრი იყო ალექსი გელაშვილი, რომელიც  სამხარეო სამმართველოს ყოფილი უფროსის ბორის თაყაიშვილის ნათესავია.  კოპაძის თქმით,  ცენტრალურ არხზე მუშაობის დროს, მან მაშინდელი სამართალდამცველების მხრიდან უფლება–მოსილების გდამეტების ფაქტებზე, არაერთი კრიტიკული სიუჟეტი მოამზადა. ამიტომ იგი ფიქრობს, რომ ეს მათი მხრიდან პირადი ანგარიშსწორებაა.

ნატა კოპაძე დარწმუნებულია, რომ სასამართლო ობიექტურ გადაწყვეტილებას გამოიტანს.

როდის გაიმართება შემდეგი პროცესი, ეს მხარეებისთვის ჯერ ცნობილი არ არის.