შინაგან საქმეთა მინისტრმა ლიკანში დაჭრილი პოლიციელები მოინახულა

შინაგან საქმეთა მინისტრმა ვახტანგ გომელაურმა საავადმყოფოში 23 იანვარს ლიკანში მომხდარი ინციდენტის დროს დაჭრილი პოლიციელები მოინახულა.

მინისტრი პოლიციელების ჯანმრთელობის მდგომარეობით დაინტერესდა და განაცხადა, რომ საჭიროების შემთხვევაში დაჭრილ სამართალდამცველებს მკურნალობა და ოპერაცია საზღვარგარეთ ჩაუტარდებათ. ვახტანგ გომელაური ასევე შეხვდა და გაესაუბრა დაჭრილი პოლიციელების ოჯახის წევრებს.

სამცხე-ჯავახეთის სამხარეო მთავარი სამმართველოს ბორჯომის რაიონული სამმართველოს უბნის ინსპექტორ-გამომძიებლები – გიორგი ბერუაშვილი და გიორგი მახარაშვილი, სამსახურებრივი მოვალეობის შესრულების დროს, ფეხით პატრულირებისას, წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ ცეცხლსასროლი იარაღიდან რამდენიმე გასროლით  დაჭრა და შემთხვევის ადგილიდან მიიმალა.

დაჭრილ პოლიციელებს გადაუდებელი სამედიცინო დახმარება ბორჯომის რაიონულ საავადმყოფოში ჩაუტარდათ, შემდეგ კი თბილისში გადაიყვანეს. ამჟამად, ისინი მკურნალობას აკადემიკოს ნ. ყიფშიძის სახელობის საუნივერსიტეტო კლინიკაში (ყოფილ რესპუბლიკურ საავადმყოფოში) გადიან .

შსს–ს ინფორმაციით, შალვა აბულაძის დასაკავებლად ოპერატიულ-სამძებრო ღონისძიებები ინტენსიურად მიმდინარეობს.