თევზჭერასთან დაკავშირებით ახალი რეგულაციები ამოქმედდება

   თევზჭერასთან დაკავშირებით მაისის თვიდან ახალი რეგულაციები ამოქმედდება. საქართველოს გარემოსა და ბუნებრივი რესურსების დაცვის მინისტრის ხათუნა გოგალაძის ინფორმაციით, 2013 წლის 31 დეკემბრის N-423 დადგენილებით დამტკიცებულ „თევზჭერისა და თევზის მარაგის დაცვის ტექნიკურ რეგლამენტში” ცვლილება შევიდა, რომლის მიხედვით, სამოყვარულო და სპორტული თევზჭერისათვის დაშვებული ბადე-იარაღების ჩამონათვალიდან ამოღებული იქნა ე.წ. “ეკრანი.”

როგორც სამინისტროში განმარტავენ, აღნიშნული ცვლილება განპირობებულ იქნა იმ გარემოებით, რომ ეკრანი არის სახლართი ტიპის ბადე, მისი მეშვეობით ჭერა კი ემყარება გახლართვისა და შებოჭვის პრინციპებს. როგორც განვლილმა პრაქტიკამ აჩვენა, თევზაობისას ხშირი იყო შემთხვევები, როდესაც ძუა, რომელზეც ეკრანია დამაგრებული წყდება და მასზე დამაგრებული სიმძიმის გამო წყალში იძირება. წყალში ჩაძირვისას ეკრან-ბადეთა ერთობლიობა ქმნიდა სახლართი ბადეებისაგან შემდგარ გროვას წყლის ფსკერზე, რომელიც თევზებისა და წყლის სხვა ცოცხალი ორგანიზმებისათვის საფრთხეს წარმოადგენდა. ის ასევე აუარესებდა წყლის ეკოლოგიურ მდგომარეობას, მასში გახლართული და შებოჭილი მკვდარი თევზების ლპობითი პროცესების მიმდინარეობის გამო.

შეგახსენებთ, რომ თევზჭერის წესების დარღვევა სამოყვარულო და სპორტული თევზჭერის იარაღისა და ხერხების გამოყენებით გამოიწვევს დაჯარიმებას 50 ლარიდან 200 ლარამდე, მოპოვებული თევზის ან წყლის სხვა ცოცხალი ორგანიზმის კონფისკაციით. განმეორებით ჩადენილი ქმედება კი ადმინისტრაციული სახდელის დადებიდან ერთი წლის განმავლობაში, გამოიწვევს დაჯარიმებას 200 დან-400 ლარამდე, სამართალდარღვევის იარაღისა და მოპოვებული თევზის ან წყლის სხვა ცოცხალი ორგანიზმის კონფისკაციით.

ამასთან,  საქართველოში ოდითგანვე არსებული სასროლი ბადის თევზაობის ტრადიციების გათვალისწინებით, ასევე, სპორტულ-სამოყვარულო თევზჭერის სწორად განვითარების მიზნით, ზემოთ აღნიშნული ცვლილებით, გაიზარდა სასროლი ბადის პარამეტრები. კერძოდ მისი დიამეტრი 1,20 მეტრის ნაცვლად გაიზარდა 4,5 მეტრამდე.

საქართველოს მთავრობის 2013 წლის 31 დეკემბრის N423 დადგენილებით დამტკიცებულ „თევზჭერისა და თევზის მარაგის დაცვის ტექნიკურ რეგლამენტში” შეტანილი ზემოთ აღნიშნული ცვლილება ძალაში 2014 წლის 24 მაისიდან შედის.