ცესკო-მ საარჩევნო უბნებზე ფოტო-ვიდეო გადაღების მკაცრი რეგულაციები გააუქმა

   ცენტრალურმა საარჩევნო კომისიამ (ცესკო) 16 ოქტომბერს გამართულ სხდომაზე განიხილა დადგენილება, რომელიც კენჭისყრის დღეს საარჩევნო უბნებზე ფოტო-ვიდეო გადაღების პროცედურებს არეგულირებს.

კომისიის გადაწყვეტილებით, დადგენილებიდან ამოღებულია პირველი მუხლის მეორე პუნქტი – ”დაუშვებელია კენჭისყრის შენობაში კენჭისყრის კაბინის ფოტო-ვიდეო გადაღება”, ვინაიდან საარჩევნო კოდექსის მერვე მუხლის 25-ე პუნქტი (”კენჭისყრის შენობაში ყოფნის უფლების მქონე პირებს, კენჭისყრის კაბინის გარდა, საარჩევნო პროცესისთვის ხელის შეშლის გარეშე, შეუძლიათ აწარმოონ ფოტო-ვიდეო გადაღება”), კენჭისყრის შენობაში  კენჭისყრის კაბინის ფოტო-ვიდეო გადაღების აკრძალვის საკითხს ისედაც არეგულირებს. კომისიამ ასევე გადაწყვიტა, გააუქმოს დადგენილების რეგულუაცია, რომლის მიხედვითაც კენჭისყრის შენობის დატოვების შემთხვევაში უფლებამოსილი პირი კარგავდა შენობაში დაბრუნების უფლებას (მე-3 მუხლის მე-4 პუნქტი).

ამავე დადგენილების მეორე მუხლის მე-2 პუნქტი კი ახალი რედაქციით ყალიბდება:  

”მინიმალური მანძილი ნებისმიერი პირისთვის ფოტო-ვიდეო გადასაღებად უნდა იყოს არანაკლებ 3 მეტრით დაშორებული გადაღების სუბიექტიდან/ობიექტიდან, გარდა იმ შემთხვევისა, როდესაც კენჭყისყრის შენობა არ იძლევა 3 მეტრიანი დისტანციის დაცვის საშუალებას. ასეთ შემთხვევაში გადასაღებ ადგილს განსაზღვრავს შესაბამისი საუბნო საარჩევნო კომისიის თავმჯდომარე”.

საარჩევნო უბნებზე ფოტო-ვიდეო გადაღების შემზღუდველი დადგენილების შეცვლას არასამთავრობო ორგანიზაციები და ჟურნალისტები ითხოვდნენ. ცესკომ სადავო დადგენილება  2012 წლის საპარლამენტო არჩევნების წინ მიიღო.